Tilkynningin sem við sendum fjölmiðlum

Við viljum ítreka að tilgangur sameiginlegrar tilkynningar okkar var að gera
grein fyrir þeim ástæðum sem lágu að baki þeirri ákvörðun að ekki væri þörf á
fulltrúa frá Hag í Hafnarfirði á upphaflega álversfundinn. Við vorum
einfaldlega að verja þá ákvörðun sem tekinn var.

Viljum við þó vekja athygli á því að eins og kemur fram í yfirlýsingu okkar
hefur fundurinn nú verið lengdur og fjölgað í pallborði. Af þeim sökum hefur
Hag í Hafnarfirði ásamt öðrum verið boðinn þátttaka á fundinum 28. mars
næstkomandi.

 Við viljum einnig benda á að sú frétt sem birtist á visir.is í dag er alröng. Við segjum hvergi að félagið Hag Hafnarfjarðar  komi ekki fram með nein ný sjónarmið. Þessi málatilbúnaður er hrein vitleysa og útúrsnúningur af verstu sort. Eins og kemur fram í tilkynningu okkar sem birtist hér á mbl.is þá segir:

Þau rök Hags Hafnarfjarðar að þau séu fylgjandi stækkun á öðrum forsendum en Alcan og ættu skilyrðislaust að fá að koma eru ekki fullnægjandi, enda eru mörg félög andvíg stækkun á öðrum forsendum en Sól í Straumi þó svo að þeim sé ekki boðið.

 Eins og sést er algjörlega verið að snúa út úr orðum okkar og þykir mér þetta hreint arfaslök æsifréttamennska af hálfu visir.is.  Og meira er ekki um þetta að segja!

Hag Hafnarfjarðar boðið að taka þátt í pallborði

Útskýring á álversfundi ungliðahreyfinganna í Hafnarfirði

Það hefur ýmislegt verið skrifað varðandi þennan blessaða álversfund sem ungliðahreyfingarnar í Hafnarfirði munu standa fyrir. Fundurinn verður þann 28 mars næstkomandi. þannig er nú mál með vexti að ég ( formaður ungra sjálftæðismanna í Hafnarfirði) ásamt hinum formönnum ungliðahreyfinganna í bænum ákváðum að halda álversfund með ungt fólk í Hafnarfirði í brennideplinum. Ákveðið var að hafa jafn marga einstaklinga með stækkun álvers og á móti. Fyrsta hugmynd var sú að halda fundinn 8 mars síðastliðinn. Var fundurinn skipulagður þannig að það yrðu fluttar fjórar framsögur.

Þeir sem flytja áttu framsögur á þessum fundi voru tveir stjórnmálamenn, annar þeirra fylgjandi stækkun en hinn ekki, og svo fulltrúi frá álverinu og fulltrúi frá Sól í Straumi. Í pallborði voru svo áætlaðir, auk þeirra sem fara með framsögu, þrír bæjarfulltrúar, einn frá Sjálfstæðisflokk sem er fylgjandi stækkun, einn frá Vinstri grænum sem er á móti og einn frá Samfylkingunni sem mun hvorki beita sér með né á móti stækkun. Þess má geta að bæjarfulltrúi sjálfstæðismann er með fyrirtæki sem er skráð í Hag í Hafnarfirði og ætti því að geta komið þeirra málstað nokkuð vel á framfæri. Þegar styttast tók í fundinn var ekki búið að ná í þann stjórnmálamann sem átti að flytja framsögu með álveri. Ákveðið var að leita til Hag í Hafnarfirði hvort þeir væru tilbúnir að senda fulltrúa sinn til að vera í pallborði. Þ.e svo það væri jafnvægi á þeim sem væru með og á móti.

Svo kom á daginn að fundinum var frestað af ýmsum ástæðum um eina viku til 15 mars. Þegar nær dregur að þeim fundi, næst loksins í þann sem menn vildu að flyttu framsögu með álverinu. Þetta er 11 mars. Þá var kominn upp sú staða að nú voru alltíeinu orðnir of margir til að flytja málstað stækkaðs álvers en á móti sem var í mótsögn við það sem upphaflega var ákveðið. Var sú ákvörðun tekinn að það væri ekki þörf á fulltrúa frá Hag í Hafnarfirði í pallborði enda fulltrúi frá Alcan á staðnum og svo bæjarfulltrúi sjálfstæðismanna og svo væru þetta altof margir einstaklingar í heildina miðað við þann tíma sem við voru að vinna með. Þegar Hag í Hafnarfirði var tjáð frá þessum ákvörðunum, verð ég að taka það á mig að það var alveg hræðilega illa orðað bréf sem ég tel að Hag í Hafnarfirði hafi misskiliðog eins og gefur þá að skilja, voru menn þar á bæ ekki sáttir með þetta.Við gerðum okkur þó ekki grein fyrir hversu mikilvægt það var fyrir Hag í Hafnarfirði að fá að vera í pallborði á fundinum. Vorum við ekki að reyna móðga einn né neinn með þessu heldur einfaldlega að gæta þess að jafnræði væri með fylkingunum á fundinum. Var svo fundinum 15 mars aftur frestað af ýmsum ástæðum til 28 mars. Þetta mun vera astæðan fyrir því hversvegna við töldum ekki þörf á fulltrúa frá Hag í Hafnarfirði. Við báðum þau velvirðingar á því að hafa boðað þau á fund sem við síðan afturkölluðum. Þessi sjónarmið voru ekki tekinn gild og menn alveg brjálaðir vegna þess að samkvæmt þeim, var verið að brjóta á þeim. Það erum við sem fundarhaldarar sem ákveðum hverjir eiga að koma að fundinum. Það var klúður af minni hálfu hvernig farið var með mál Hags í Hafnarfirði. Það sem þó er alvarlegra í þessu máli er eftirfarandi: 

Það er aftur á móti ekkert sem ég né aðrir hjá ungliðahreyfingunum sögðum eða gerðum sem réttlætir að væna okkur um að draga boð okkar til baka vegna mótmæla frá öðrum þáttakendum.  Það að leggja til að VG eða Sól í Straumi hafi mótmælt komu Hags í Hafnarfirði er algjörlega út í hött. Þetta eru alvarlegar ásakanir sem eiga ekki við nokkur rök að styðjast og förum við  fram á að þær verði leiðréttar hið snarasta.